Afroaster ananthocladus (Hilliard & B.L.Burtt) J.C.Manning & Goldblatt

Herba perennis; rhizoma tenue (1 mm diam.) breve subterraneum reptans radices breves tenuiter tuberosas et caules paucos erectos glabros tenues c. 30 cm altos et 1 mm diametro emittens; caulis princeps capitulo solitario terminatus, ramulos 2-3 laterales pergraciles ad apices subflexuosos steriles (raro capitulo parvo terminatos) emittens; caules ramulique virides, subaphylli. Folia radicalia tempus florendi emarcida, 2-3, usque ad 22 mm longa (petiolo laminae aequali incluso), oblanceolata, lamina ad 5 mm lata, apice apiculato, utrinque pilis basi bulbosis vestita. Folia caulina usque ad 33 x 2 mm, sursum decrescentia, inter se distantia, lineari-lanceolata, summa linearia, appressa, marginibus incrassatis scabridis cetero glabra, uninervia. Capitula solitaria, heterogama, radiata. Involucri bracteae biseriatae, ad 5 x 1.5 mm, carina fusca resinosa viridi-marginata excepta membranaceae ad apices pallide purpureae, glabrae, marginibus fimbriatis. Flores radii c. 13, feminei; corollae tubo 2 mm longo, parce ciliato, limbo anguste elliptico 7 x 2 mm pallidissime lilacino; ovarium 1.25 mm longum, pilis longis et glandulis brevibus vestitum; pappus biseriatus, serie exteriore e squamis brevibus, interiore e setis barbellatis corollae limbo paulo longioribus composita. Flores disci c. 33, hermaphroditi; corolla lutea, anguste infundibuliformis, 3 mm longa, parce et minute ciliata; ovarium et pappus ut in flore radii. Achaenia haud visa.